Ang Banal na Trinidad (The Holy Trinity)

“Pakinggan mo, O Israel: Si Yahweh na ating Diyos ay iisang Yahweh.” – Deuteronomio 6:4

Panimula

Isa sa pinakamalalim at pinakapundamental na doktrina ng pananampalatayang Kristiyano ay ang Trinidad (Holy Trinity).
 

Bagaman hindi direktang mababasa sa Biblia ang salitang “Trinity,” malinaw na ipinapahayag ng Kasulatan ang katotohanang ito — na ang Diyos ay iisa, subalit nahahayag sa tatlong Persona:  Ama, Anak, at Espiritu Santo — pantay sa pagka-Diyos, kapangyarihan, at kaluwalhatian.

Sa bawat aspeto ng ating kaligtasan, makikita ang pagkilos ng tatlong Persona:

• Ang Ama bilang nagplano at nagsugo.

• Ang Anak (Jesus Cristo) bilang Tagapagligtas, na nag-alay ng Kanyang buhay.

• Ang Espiritu Santo bilang Patnubay na nagpapabanal at nagbibigay-buhay sa mga mananampalataya.

Ang iglesya ay naninindigan sa katotohanang ito batay lamang sa Salita ng Diyos (Sola Scriptura).

Tatlong Persona ng Iisang Diyos

1. Ang Ama – Ang Pinagmulan ng Lahat

Ang Diyos Ama ang Manlilikha, banal, makatarungan, at tapat.
Sa Kanya nagmula ang lahat ng bagay, at Siya ang nagtakda ng Kanyang dakilang plano ng kaligtasan.

2. Ang Anak – Si Jesu-Cristo, ang Diyos na Nagkatawang Tao

Si Jesus ang Bugtong na Anak ng Diyos, tunay na Diyos at tunay na tao.
Sa pamamagitan ng Kanyang kamatayan at muling pagkabuhay, tinubos Niya tayo mula sa kasalanan at kamatayan.

“Ako at ang Ama ay iisa.” – Juan 10:30
“Ang buong kalikasan ng Diyos ay na kay Cristo.” – Colosas 2:9

3. Ang Espiritu Santo – Ang Patnubay at Tagapagtibay

Ang Espiritu Santo ay tunay na Diyos at Persona na kumikilos sa loob ng puso ng mananampalataya.
Siya ang nagbibigay ng kapangyarihan, karunungan, at kabanalan upang mamuhay ayon sa kalooban ng Diyos.

“Hindi ka nagsinungaling sa tao, kundi sa Diyos.” – Mga Gawa 5:4
“Siya ang Espiritu ng katotohanan… Siya’y mananatili sa inyo.” – Juan 14:16–17

Mga Ilustrasyon ng Trinidad

Ang mga ilustrasyong ito ay pantulong lamang upang maunawaan ang Trinidad, ngunit hindi ganap na makapaglalarawan sa kabuuan ng Diyos.

Araw (Sun Illustration)

• Araw = Ama

• Liwanag = Anak (nagbibigay-liwanag sa sanlibutan)

• Init = Espiritu Santo (nararanasan at nagbibigay-buhay)

Iisang araw, tatlong aspeto na magkaugnay at hindi mapaghihiwalay.

Tubig (Water Illustration)

• Yelo (solid)

• Tubig (liquid)

• Singaw (gas)
  Tatlong anyo, ngunit iisang likas — tubig.

Babala: Maaaring magdulot ng maling pagkaunawa kung isipin na ang Diyos ay nagpapalit-palit lamang ng anyo (modalism).

Tao (Human Illustration)

Isang tao ay maaaring anak, magulang, at asawa sa iba’t ibang relasyon.  Magkakaibang papel, ngunit iisang pagkatao. 

Babala: Hindi ito ganap na akma sapagkat ang Diyos ay tatlong Persona, hindi tatlong papel lamang.

Iba Pang Halimbawa

• 3-in-1 Coffee – Kape, asukal, at creamer

• Itlog – Puti, dilaw, at balat

Babala: Ang mga halimbawa ay limitadong tulong lamang. Ang tunay na pagkaunawa sa Trinidad ay hiwaga ng Diyos na higit sa ating isipan.

Mga Talata sa Banal na Kasulatan

1. Ang Diyos ay Iisa

“Pakinggan mo, O Israel: Si Yahweh na ating Diyos ay iisang Yahweh.” – Deuteronomio 6:4

2. Kapahayagan ng Tatlong Persona

“Bautismuhan ninyo sila sa pangalan ng Ama, at ng Anak, at ng Espiritu Santo.” – Mateo 28:19

 “Nawa’y sumainyo ang kagandahang-loob ng Panginoong Jesu-Cristo, ang pag-ibig ng Diyos, at ang pakikisama ng Espiritu Santo.” – 2 Corinto 13:13 

“Ito ang minamahal kong Anak na lubos kong kinalulugdan.” – Mateo 3:16–17

3. Pagkakaisa ng Ama at Anak

“Ako at ang Ama ay iisa.” – Juan 10:30
“Ang buong kalikasan ng Diyos ay na kay Cristo.” – Colosas 2:9

4. Ang Espiritu Santo bilang Diyos

“Hindi ka nagsinungaling sa tao, kundi sa Diyos.” – Mga Gawa 5:3–4

5. Ang Anak at Espiritu Santo sa Pagpapahayag ng Diyos

“Nang pasimula ay naroon na ang Salita; ang Salita ay kasama ng Diyos, at ang Salita ay Diyos.” – Juan 1:1–3
“Naging tao ang Salita at nanirahan sa piling namin.” – Juan 1:14

Ang Salita (Logos) ay tumutukoy kay Jesus Cristo, ang Anak ng Diyos.  Bago pa man likhain ang sanlibutan, Siya ay umiiral na at kasama ng Ama.  Lahat ng nilikha ay dumaan sa pamamagitan Niya, at Siya ay Diyos na nagkatawang-tao upang tayo ay iligtas.

Pangwakas na Mensahe

Ang Diyos ay iisa, subalit Siya ay nahahayag sa tatlong Persona: Ama, Anak, at Espiritu Santo.

Ang bawat Persona ay ganap na Diyos, pantay sa kapangyarihan at kaluwalhatian, ngunit may natatanging papel sa plano ng kaligtasan:

• Ang Ama – nagplano at nagsugo.

• Ang Anak – nagligtas sa pamamagitan ng kamatayan at muling pagkabuhay.

• Ang Espiritu Santo – nagpapatupad ng pagbabago, kabanalan, at lakas sa buhay ng mga mananampalataya.
  
  

Ang mga ilustrasyon ay tulong lamang, ngunit ang tunay na pagkaunawa sa Trinidad ay nagmumula sa pananampalataya at pahayag ng Salita ng Diyos.

Konklusyon

Ang aral ng Trinidad ay isang banal na hiwaga — higit sa kayang maipaliwanag ng isipan ng tao, ngunit sapat na malinaw upang sambahin, paniwalaan, at sundin.

Ang pagkilala sa Ama, Anak, at Espiritu Santo ay hindi lamang kaalaman, kundi paanyaya sa mas malalim na relasyon sa Diyos.

Kaya bilang mga mananampalataya, tayo ay tinatawagan upang:

• Sumamba nang may galak at paggalang,

• Magtiwala sa Diyos sa lahat ng bagay, at

• Mamuhay nang may kabanalan at ganap na pagtatalaga sa Kanya.

“Purihin ang Diyos Ama, Anak, at Espiritu Santo — gaya ng sa pasimula, ngayon, at magpakailanman.”